Бишкек, 29.04.26 /Кабар/. Жер титирөөгө туруктуу курулуш жана инженердик долбоорлоо мамлекеттик институтунун адистери Кытайдын Пекин шаарына иш сапары менен барды.
Курулуш, архитектура жана турак жай-коммуналдык чарба министрлигинен билдиришкендей, иш сапардын алкагында кыргыз делегациясы дүйнөдөгү алдыңкы курулуш корпорацияларынын бири – CSCEC өкүлдөрү менен жолугушту.
Тараптар курулуш тармагындагы заманбап инженердик чечимдер жана инновациялык технологиялар боюнча пикир алышты.
Кыргызстандык адистер Пекиндин тектоникалык жаракага жакын жайгашкан Шицзиншань районундагы курулуш объектисине барып, жер титирөөгө туруктуулукту жогорулатуучу атайын технологиялар менен таанышты.
Имараттарды долбоорлоодогу BIM (маалыматтык моделдештирүү) технологиясы жана термелүүнү азайтуучу демпфердик түзүлүштөрдү колдонуу тажрыйбасы изилденди.
Ошондой эле бийик имараттарды долбоорлоодогу өрт коопсуздугу, түтүн чыгаруу жана инженердик коммуникациялар боюнча кытайлык кесиптештердин презентациясы сунушталды.
Жыйынтыгында тараптар долбоорлоо жана курулуш тармагында тажрыйба алмашууну туруктуу негизде улантууну макулдашты. Бул кызматташтык Кыргызстандагы курулуш сапатын жана сейсмикалык коопсуздукту жаңы деңгээлге көтөрүүгө багытталган.
