Бишкек, 25.11.25. /Кабар/. Курулуш, архитектура жана турак жай-коммуналдык чарба министри Нурдан Орунтаев 100дөн ашык курулуш компанияларынын жетекчилери менен жолукту.
Ведомстодон маалымдашкандай, жолугушууда Орунтаев министрлер кабинетинин 2025-жылдын 2-июлундагы №393 токтомун ишке ашыруу жана ага киргизилген өзгөртүүлөр боюнча кенен түшүндүрмө берди.
Белгилей кетсек, “Мамлекеттик архитектуралык-курулуштук көзөмөл жүргүзүүнүн тартиби жөнүндөгү жобого” толуктоолор киргизилди. Мындан ары курулуп жаткан объекттердин реестрине капиталдык курулуш, реконструкциялоо, имараттарды кайра профилдештирүү жана кайра пландоо объекттерин киргизүү (республикалык жана жергиликтүү бюджеттин эсебинен каржылануучу объекттерден тышкары) акы төлөнүүчү негизде жүзөгө ашырылат.
Төлөмдүн өлчөмү жана тартиби КР ченемдик-укуктук актыларына ылайык белгиленет. Тиешелүү төлөм курулуш субъекттери объектини реестрге киргизүү боюнча арыз берүүдөн мурда жүргүзүлөт.
Акы төлөнүүчү кызматтарды киргизүүнүн негизги максаты:
- объекттерди каттоонун бирдиктүү механизмин түзүү;
- курулуш сапатын жана коопсуздукту жогорулатуу;
- курулуп жаткан объекттердин реестрин бир калыпта түзүү;
- курулуш процессинде туруктуу мамлекеттик көзөмөлдү камсыз кылуу;
- коррупциялык тобокелдиктерди азайтуу.
Министр өз сөзүндө бул өзгөртүүлөр курулуш тармагындагы тартипти чыңдоого, объектилерди каттоонун бирдиктүү механизмин түзүүгө жана курулуштун ар бир этабынын коопсуздугун камсыз кылууга багытталгандыгын белгиледи.
"Биздин милдет ачык, системдүү жана жоопкерчиликтүү көзөмөлдү түзүү жана куруучуларды колдоо болуп саналат", - деди ал.
Жолугушуу курулуш компанияларынын жетекчилери тарабынан берилген суроолор жана тактоолор менен коштолду.
