Бишкек, 24.03.26. /Кабар/. Нарын облусундагы Орто-Токой суу сактагычында курулуп жаткан ГЭСтин негизги жумуштары аяктап, ишке киргизүүгө даярдыктар башталды.
Энергетика министрлигинен билдиришкендей, курулуш иштери азыр эң акыркы баскычында турат.
Белгиленгендей, адистер эң татаал делген техникалык жумуштарды бүтүрүштү:
- Суу агуучу атайын туннель казылып бүттү.
- Суу топтолуучу шахтанын бетондору куюлду.
- Электр тогун иштеп чыгуучу №1 агрегаттын (генератордун) негизги тетиктери орнотулду.
ГЭС иштеп баштаганда, ал жерден чыккан ток жалпы мамлекеттик системага кошулушу керек.
Ошол себептен учурда төмөнкү иштер аткарылууда:
- Бийик чыңалуудагы зымдарды тартуу үчүн темир мамылар орнотулуп жатат. Ал жерлерге техникалар барышы үчүн атайын жолдор салынууда.
- Суу агып чыга турган каналдын жээктери бекемделип, сууну тазалоочу чыпкалар коюлууда.
"Орто-Токой ГЭСи ушул жылы ишке берилет. Бул станция иштеп баштаса, өлкөдө өндүрүлгөн электр энергиясынын көлөмү көбөйөт. Бул өзгөчө кышкысын жарыктын өчпөй, ишенимдүү берилишине чоң жардам болот",-деп айтылат маалыматта.
