Бишкек, 16.10.25. /Кабар/. Бүгүн Коргоо министрлигинде аскердик терминдердин орусча-кыргызча сөздүгүнүн бет ачары өттү.
Ведомстводон маалымдашкандай, иш-чарага коргоо министри Руслан Мукамбетов, президентке караштуу Мамлекеттик тил жана тил саясаты боюнча улуттук комиссиянын төрагасы Мелис Мураталиев, Терминологиялык комиссиянын төрагасы Кадаңбай Бактыгулов, Кыргыз энциклопедия жана терминология борборунун директору Темирбек Осмоналиев, Жогорку Кеңештин Аппаратынын котормо, редакциялоо жана лингвистикалык кызмат бөлүмүнүн башчысы Азимжан Ибраимов, ошондой эле Коргоо министрлигинин аскер кызматчылары катышты.
Анда сөздүктүн мазмуну талкууланып, катышуучулар тарабынан бир катар сунуштар айтылды.
Иш-чара мамлекеттик тилди өнүктүрүүгө жана аскердик терминологияны бир системага келтирүүгө багытталган маанилүү кадам катары белгиленди.
