Бишкек, 18.06.26. /Кабар/. Ички иштер министри Улан Ниязбеков КМШ өлкөлөрүнүн борбордук укук коргоо бөлүмдөрүнүн жетекчилери менен жолукту.
Ведомстводон маалымдашкандай, жолугушуу шериктештикке мүчө мамлекеттердин ички иштер органдарынын борбордук бөлүмдөрүнүн жетекчилеринин VI кеңешмесинин алкагында өттү.
Иш-чарага Азербайжан, Армения, Беларусь, Казакстан, Кыргызстан, Россия, Тажикстан, Түркмөнстан жана Өзбекстандын өкүлдөрү, ошондой эле шериктештиктин аймагында уюшкан кылмыштуулукка жана башка коркунучтуу кылмыштарга каршы күрөшүүнү координациялоо бюросунун жана КМШнын аткаруу комитетинин өкүлдөрү катышты.
Улан Ниязбеков өз сөзүндө коомдук коопсуздукту жана укук тартибин камсыздоодо борбордук бөлүмдөрдүн өзгөчө ролун белгиледи. Ал азыркы учурда борбор калаалар ишкердиктин, транспорттун, каржы агымдарынын жана миграциялык активдүүлүктүн ири борборлору болуп саналарын, анда стратегиялык маанидеги инфраструктуралар жайгашып, күн сайын миллиондогон адамдар жүрөрүн белгиледи.
"Мындан тышкары, бүгүнкү күндө коркунучтар чек арадан ашкан жана жогорку технологиялык мүнөзгө ээ болууда. Алардын катарына киберкылмыштуулук, алдамчылык, баңгизаттардын мыйзамсыз жүгүртүлүшү, мыйзамсыз миграция жана экстремизм кирет. Мындай коркунучтарга каршы натыйжалуу күрөшүү өз ара ишенимге, урматтоого жана биргелешкен аракеттерге негизделген эл аралык кызматташтыксыз мүмкүн эмес", - деди министр.
Жолугушуунун жүрүшүндө КМШ мейкиндигиндеги өз ара кызматташууну өнүктүрүү маселелерине өзгөчө көңүл бурулду. Улан Ниязбеков КМШга мүчө мамлекеттердин ички иштер министрлеринин кеңешинин коопсуздукту жана укук тартибин камсыздоо боюнча макулдашылган ыкмаларды иштеп чыгууда, ошондой эле укук коргоо органдарынын ортосундагы кесиптик байланыштарды чыңдоодо маанилүү аянтча болуп саналарын белгиледи.
Жолугушуунун соңунда министр кеңешменин катышуучуларына жогорку кесипкөйлүгү жана кызматтык милдетине берилгендиги үчүн ыраазычылык билдирип, ишине ийгиликтерди, конструктивдүү диалогду жана мерчемделген демилгелердин ийгиликтүү ишке ашырылышын каалады.
