Бишкек, 20.12.25. /Кабар/. Өрт кырсыктарынын 60 пайызы электр жабдууларын туура эмес колдонуудан келип чыгат. Бул тууралуу ӨКМден билдиришти.
Ведомствонун маалыматына караганда, электр жабдууларынан келип чыккан өрт — эң кооптуу жана олуттуу зыяндарга учураткан коркунучтуу кырсык.
Акыркы убакта көп кабаттуу үйлөрдө, жеке турак жайларда электр жабдууларынан келип чыккан өрттөр кескин көбөйдү. Статистиканы алсак, 2025-жылдын 11 айы ичинде 3388 өрт кырсыгы катталган болсо, алардын дээрлик 60 пайызы электр жабдууларын туура эмес колдонуудан келип чыккан. Айтсак:
- бузулган же эскилиги жеткен электр чубалгылары;
- электр зымдарын орнотууда туура эмес монтаждоо;
- ашыкча күч келтирүү;
- сапатсыз же арзан материалдарды сатып алуу;
- автоматтык которууларды туура эмес тандоо;
- кыска туташуулар, мындай өрт тез жайылып, адам өмүрүнө, үй-жайга жана мүлккө ири зыян келтирет.
