Бишкек, 20.08.26. /Кабар/. Дүйнөлүк көчмөндөр оюндарынын расмий сайтында жасалма интеллект пайда болду. Бул тууралуу Көчмөндөр оюндарынын катчылыгынан билдиришти.
Маалыматка ылайык, жасалма интеллектке оюндар жөнүндө суроолорду берип, кыргыз, орус же англис тилинде жооп алса болот. Ал Дүйнөлүк көчмөндөр оюндары менен кыргызстандык AIRUN AI-компаниясынын өнөктөштүгүнүн алкагында ишке киргизилди.
Ири эл аралык иш-чара сөзсүз түрдө миңдеген практикалык суроолорду жаратат: мелдештер кайда жана качан өтөт, керектүү аянтчага кантип жетүү керек, билеттерди кайдан сатып алса болот, алардын баасы канча, белгилүү бир күнгө кандай иш-чаралар пландаштырылган жана оюндардын программасы кандай түзүлгөн.
Эми бул суроолорго жоопту түздөн-түз Дүйнөлүк көчмөндөр оюндарынын сайтынан алууга болот. Сайттын ылдыйкы оң бурчундагы AI-чатты ачып, кыргыз, орус же англис тилинде суроо берүү жетиштүү.
AIRUN менен Дүйнөлүк көчмөндөр оюндарынын өнөктөштүгү AI-чат менен эле чектелбейт. Команда атайын оюндар үчүн аудитория менен байланышта колдонула турган санариптик AI-аватарды да түзүп жатат. Дагы бир багыт болуп биринчи кезекте кыргыз тилиндеги эмоционалдык AI-үндөө технологиясы саналат, ал керектүү интонациялар жана эмоционалдык берүү менен табигый кепти генерациялоого мүмкүндүк берет.
“Кыргызстанда жасалма интеллект иштеп чыккан компания катары биз үчүн мындай долбоорго катышуу өзгөчө маанилүү. Дүйнөлүк көчмөндөр оюндары биздин тарыхыбызды, маданиятыбызды жана салттарыбызды дүйнөгө тааныштырат. Биз ошону менен бирге Кыргызстанды өздүк алдыңкы технологияларды түзө алган жана аларды эң ири эл аралык иш-чараларда колдоно алган өлкө катары билишерин каалайбыз. Биз үчүн бул – дүйнөлүк деңгээлдеги заманбап AI-чечимдер ушул жерде, биздин инженерлер тарабынан, биздин тилде түзүлө аларын көрсөтүү мүмкүнчүлүгү”, – деп белгиледи AIRUN компаниясынын башкы директору Чыңгыз Арзиев.
Дүйнөлүк көчмөндөр оюндары спорттук, маданий жана илимий программаларды бириктирет жана көчмөн элдердин мурасын сактоо жана жайылтуу үчүн эл аралык аянтча болуп саналат.
“Дүйнөлүк көчмөндөр оюндары үчүн ата мекендик компанияларды колдоо жана бүгүнкү күндө өлкө ичинде түзүлүп жаткан мүмкүнчүлүктөрдү пайдалануу маанилүү. Кыргызстанда жасалма интеллекттин өздүк технологияларын өнүктүрүп, аларды практикада колдоно алган командалар бар экенине кубанабыз. AIRUN менен өнөктөштүк бизге оюндардын коноктору менен өз ара аракеттенүүнү ыңгайлуурак кылууга жана ошол эле учурда өлкөбүздүн технологиялык потенциалын эл аралык аудиторияга көрсөтүүгө мүмкүндүк берет”, – деп белгиледи Дүйнөлүк көчмөндөр оюндарынын эл аралык катчылыгынын жетекчиси Нурсултан Аденов.
