Бишкек, 10.07.26. /Кабар/. Бүгүн Кыргыз экономикалык университетинин башкы корпусунда VI Дүйнөлүк көчмөндөр оюндарына даярдыктын алкагында ыктыярчылар үчүн акыркы окутуу лекциясы өткөрүлдү.
Маданият, маалымат жана жаштар саясаты министрлигинен билдиришкендей, лекциянын негизги темасы "Спорттук оюндар" болду.
Иш-чарага маданият министри Мирбек Мамбеталиев, Дене тарбия жана спорт мамлекеттик агенттигинин Улуттук спорт түрлөрү боюнча дирекциясынын жана VI Дүйнөлүк көчмөндөр оюндарынын Катчылыгынын өкүлдөрү катышты.
Иш-чарага 300 ыктыярчы катышып, Дүйнөлүк көчмөндөр оюндарын уюштуруу жана өткөрүү боюнча негизги багыттар боюнча окутуудан өтүштү.
"Лекциянын жүрүшүндө катышуучулар улуттук спорт түрлөрүнүн өзгөчөлүктөрү, мелдештердин программасы, ошондой эле оюндарды өткөрүү мезгилиндеги ыктыярчылардын милдеттери жана жоопкерчиликтери тууралуу кеңири маалымат алышты", - деп айтылат маалыматта.
Белгилей кетсек, бул окутуу ыктыярчыларды VI Дүйнөлүк көчмөндөр оюндарына сапаттуу даярдоого багытталган акыркы лекция болуп, алардын алдыдагы ишмердүүлүгүнө маанилүү өбөлгө түзөт.
