Бишкек, 10.06.26. /Кабар/. Бүгүн, 10-июнда Ош шаарынан “Көч жолу” аттуу эл аралык автоэкспедиция Алтайга жөнөп кетти. Бул тууралуу мэриядан билдиришти.
Маалыматка ылайык, сапарга беш саякатчы жигит катышууда.
Алар Ош – Алматы – Талдыкоргон – Семей – Барнаул – Тоолуу Алтай – Монголия маршруту боюнча 30 күн жол жүрүшөт. Сапар Улуу көч жолунун тарыхый-маданий мурастарын изилдөө, боордош элдердин ортосундагы достукту чыңдоо жана ички туризмди жайылтуу максатын көздөйт.
“Саякатчылар жол бою кооз жерлерди, тарыхый эстеликтерди кыдырып, жергиликтүү элдин турмушу, каада-салты менен таанышмакчы. Экспедициянын жүрүшү социалдык тармактарда чагылдырылып турат”, - деп белгилешти мэриядан.
