Бишкек, 06.04.26. /Кабар/. Казань шаарында өткөн "Энергопром" форумунда Кыргызстандын энергетикалык потенциалы көрсөтүлдү. Бул тууралуу Энергетика министрлигинен маалымдашты.
Ага ылайык, ири энергетикалык форум бул жылы да дүйнөнүн ар тарабынан келген адистерди, инвесторлорду жана ири компанияларды бир аянтчага чогултту.
Форумдун алкагында энергетикалык машина куруу, газомотордук отун, электр транспортун кубаттоочу инфраструктура, альтернативдүү энергия булактары жана санариптештирүү сыяктуу эң актуалдуу темалар кеңири талкууланды.
Ошондой эле эл аралык деңгээлдеги көргөзмө уюштурулуп, катышуучулар өз өлкөлөрүнүн эң акыркы технологияларын, жабдууларын жана келечектүү долбоорлорун тааныштырышты.
Кыргызстандын делегациясын энергетика министри Таалайбек Ибраев жетектеп, акыркы жылдары өлкөдө жүрүп жаткан ири энергетикалык долбоорлорду тааныштырды.
Көргөзмөдө тигилген кыргыздын боз үйүнүн ичинде энергетикалык долбоорлордун макети, жаңы станциялар, модернизацияланып жаткан объекттер жана тармактагы инновациялык чечимдер көрсөтүлдү.
