Бишкек, 29.08.2025. /Кабар/. Күн мурун Кара-Көл шаарынын мугалимдерине “Алтын Казык” ноутбуктары тапшырылды.
Агартуу министрлигинен билдиришкендей, Кара-Көл шаарында билим берүү тармагынын кызматкерлеринин август педагогикалык кеңешмеси болуп, ага министрлер кабинетинин төрагасынын орун басары Эдил Байсалов баштаган бир катар жетекчилер катышты.
Кеңешменин катышуучуларына 2024-2025-окуу жылындагы жетишкендиктер тууралуу маалымат берилип, 12 жылдык билим берүүдө инсанга багыттап окутуу жана мугалимдин ролу жөнүндө баяндама жасалды.
"Иш-чаранын алкагында STEM багытында сабак берген 77 мугалимге “Алтын Казык” бренди менен тааныла баштаган ата мекендик ноутбуктар салтанаттуу түрдө тапшырылды",-деп айтылат маалыматта.
Эске салсак, 7-августта Агартуу министрлиги 27 миңден ашык ноутбук аймактарга жөнөтүлгөнүн маалымдаган.
