Бишкек, 14.11.26. /Кабар/. Ош облусунда "Ынтымак" (Кемпир-Абад) чек ара посту ачылып, Чоң-Алай районундагы "Кара-Шыбак" чек ара заставасынын кызматкерлерине 20 батирлүү кызматтык үй тапшырылды.
Маалыматка ылайык, ачылыш аземине президенттин Ош облусундагы өкүлү Аманкан Кенжебаев, Мамлекеттик чек ара кызматынын өкүлдөрү, чек арачылар жана жергиликтүү тургундар катышты.
Кызматтык турак үй республикалык бюджеттин эсебинен курулуп, чек арачылардын үй-бүлөлөрүнө бардык заманбап шарттары менен берилди.
Иш-чарада Аманкан Кенжебаев чек ара кызматынын материалдык-техникалык базасын чыңдоо жана кызматкерлердин социалдык шарттарын жакшыртуу маанилүү экенин белгиледи.
Ал тынчтык менен туруктуулук өлкөнүн өнүгүүсүнүн негизги шарттарынын бири экенин айтып, коңшу мамлекеттер менен достук мамилени бекемдөөгө чакырды.
