Бишкек, 01.01.26. /Кабар/. Бүгүн, 1-январда министрлер кабинетинин төрагасынын орун басары — Улуттук коопсуздук мамлекеттик комитетинин төрагасы Камчыбек Ташиев Сузак районунда жайгашкан "Бек-Абад" чек ара өткөрмө пунктуна күтүүсүз иш сапары менен барды. Бул тууралуу ведомстводон билдиришти.
Атайын кызматтын төрагасы өткөрмө пунктунун аймагын иретке келтирип, оңдоп-түзөө иштерин жүргүзүү жана жашылдандыруу зарылдыгын белгиледи.
Ошону менен бирге ал чек арадан өтүү учурунда жарандар үчүн ыңгайлуу шарттарды түзүп, узун кезектердин пайда болушуна жол бербөө, кызматкерлердин ыкчам жана так иштөөсүн камсыз кылуу керектигин баса белгиледи.
Иш сапардын алкагында ал чек арада нөөмөттө турган аскер кызматкерлери менен жолугуп, алардын кызмат өтөө шарттары жана чек араны коргоо боюнча жүргүзүлүп жаткан иштери менен жеринен таанышты.
Ошондой эле текшерүүнүн жүрүшүндө бир катар кемчиликтер аныкталып, аларды жоюу боюнча тиешелүү жетекчилерге тапшырмалар берди.
