Бишкек, 26.06.26. /Кабар/. Кадамжай шаарында президенттин шаарларды өнүктүрүү жана турак жай фондун жаңылоо боюнча тапшырмасынын алкагында реновация программасына расмий түрдө старт берилди.
Президенттин Баткен облусундагы өкүлчүлүгүнөн билдиришкендей, долбоордун алкагында жер титирөөдөн жабыркаган жана эскилиги жеткен үйдүн ордуна коопсуз, бардык шарттары бар заманбап көп кабаттуу үйдүн курулушу башталды.
Курулуш аянтчасына президенттин өкүлү Мамыржан Рахимов барып, долбоор менен жеринен таанышты. Жаңы имарат 112 батирден турат. Анда 48 бир бөлмөлүү, 48 эки бөлмөлүү жана 16 үч бөлмөлүү батир каралган. Эски үйдө жашап жаткан 8 үй-бүлөгө курулуш бүткөндөн кийин жаңы имараттан толугу менен заманбап шарттары бар 8 батир акысыз берилери айтылды.
Долбоор жеке курулуш компаниясы тарабынан каржыланууда. Курулуш иштерин бир жылдан ашуун убакытта аяктоо пландалууда.
Белгиленгендей, бул программа эски турак жайларды жаңылоого, шаардын архитектуралык көрүнүшүн жакшыртууга жана жарандардын коопсуздугун камсыздоого багытталган.
