Бишкек, 25.06.26. /Кабар/. Кадамжай районунда аз камсыз болгон жана жардамга муктаж жарандар үчүн жаңы социалдык шаарчанын курулушу башталды.
Президенттин Баткен облусундагы өкүлчүлүгүнөн билдиришкендей, жаңы маанилүү объекттин пайдубалын түптөө иш-чарасына президенттин өкүлү Мамыржан Рахимов, "Ассанабиль" кайрымдуулук фондунун өкүлдөрү жана Кувейт мамлекетиндеги Шейх Абдулла Нурий уюмунун жетекчилери катышты.
Бул ири долбоор толугу менен Кувейт мамлекетиндеги Шейх Абдулла Нурий уюмунун каржылоосу менен ишке ашууда. Шаарчанын алкагында төмөнкүдөй заманбап инфраструктуралык объекттердин курулушу пландалган:
- 60 үй-бүлөгө ылайыкталган бардык шарттары менен турак жайлар;
- 220 окуучуга ылайыкталган заманбап мектеп;
- 60 орундуу балдар бакчасы;
- фельдшердик-акушердик пункт жана дарыкана;
- жергиликтүү тургундарды жумуш менен камсыз кылуучу тигүү цехи;
- мечит жана азык-түлүк дүкөнү.
Белгиленгендей, курулуш иштерин бир жылдын ичинде толугу менен бүткөрүү пландалууда.
