Бишкек, 10.02.26 /Кабар/. “Кабар” агенттиги Дүйнөлүк көчмөндөр оюндарынын расмий эл аралык медиа өнөктөшү болду. Бул тууралуу аталган масштабдуу иш-чараны чагылдыруу боюнча меморандумга кол коюу учурунда белгилүү болду.
Анда Дүйнөлүк көчмөндөр оюндарынын эл аралык катчылыгынын жетекчиси Нурсултан Аденов оюнду дүйнөгө таанытууда жалпыга маалымдоо каражаттарынын ролу чоң экендигин белгиледи.
“Биздин максатыбыз аталган оюнду дүйнөгө туура, жакшы тарабынан таанытуу. Ошондуктан, ЖМКлар ага өзүлөрүнүн чоң салымын кошо алышат”,-деди ал.
Ошондой эле Аденов “Кабар” маалымат агенттигин дүйнөлүк ЖМКлар менен кызматташтыгы бар маанилүү медиа өнөктөш катары баалады.
“Биз буга чейинки оюндарда расмий агенттик катары “Кабардан” маалыматтарды алып келгенбиз. Алдыда дагы аны менен иштешүү тууралуу келишимге кол койдук. Ал биздин эл аралык ЖМКлар менен байланышы бар башкы өнөктөшүбүз болмокчу. Ошондой эле биз "Кабардын" бардык эл аралык өнөктөштөрү менен иш алып баралы деп жатабыз”,-деп кошумчалады Аденов.
