Бишкек, 13.03.26. /Кабар/. Бишкекте "Адам ресурстарын өнүктүрүү боюнча стипендиялык программа" (JDS) долбоорунун башкаруу комиссиясынын кезектеги отуруму өттү.
Мамлекеттик кызмат жана жергиликтүү өз алдынча башкаруу иштери боюнча мамлекеттик агенттигинен билдиришкендей, анда 2025-жылга карата программанын финалисттерин бекитүү маселеси каралды.
Жыйынга Мамлекеттик кызмат жана жергиликтүү өз алдынча башкаруу иштери боюнча мамлекеттик агенттиктин директору Элчибек Жантаев, Япониянын элчиси Хирано Рюичи жана JICA`нын өкүлү Нишигата Котаро катышты.
Белгиленгендей, JDS-2025 программасына талапкерлерди тандоо бир нече татаал баскычтан турду:
- документтерди текшерүү;
- англис тили жана математика боюнча сынактар;
- Япон университеттеринин профессорлору менен техникалык маектешүү;
- башкаруу комиссиясы менен жыйынтыктоочу маек.
Бул жолку тандоодо өлкөнүн аймактарынан келген талапкерлерге өзгөчө көңүл бурулду.
Агенттиктин жетекчилиги белгилегендей, аймактагы адистерди эл аралык деңгээлде даярдоо мамлекеттик башкаруу тутумун күчөтүүдө стратегиялык мааниге ээ.
Отурумдун соңунда 19 жеңүүчүнү бекитүү чечими кабыл алынды. Эми тиешелүү мамлекеттик органдар адистерди Япониянын алдыңкы университеттерине окууга жөнөтүү үчүн документтерди даярдоого киришет.
Бул программа Кыргызстандын мамлекеттик кызматы үчүн жогорку квалификациялуу кадрларды даярдоого жана эки өлкөнүн кызматташтыгын бекемдөөгө багытталган.
