Бишкек, 28.01.26. /Кабар/. Грузиянын тышкы иштер министринин орун басары Александр Хвтисиашвили Кыргызстанга келди. Бул тууралуу Соода-өнөр жай палатасынан билдиришти.
Маалыматка ылайык, Соода-өнөр жай палатасынын президенти Темир Сариев жана Александр Хвтисиашвили жүк ташуу жана логистика жаатындагы кызматташтыкты өнүктүрүү маселелерин талкуулап, эки өлкөнүн ортосундагы соода-экономикалык кызматташтыкты кеңейтүү келечеги менен бөлүштү.
Ишкерлердин өкүлдөрү компаниялар Грузия аркылуу товарларды ташууда туш болгон бир катар практикалык маселелерди жана кыйынчылыктарды белгилешти. Атап айтканда, алар жеткирүү мөөнөттөрү, логистикалык маршруттарды оптималдаштыруу жана административдик жол-жоболор сыяктуу темаларды көтөрүштү.
Александр Хвтисиашвили көтөрүлгөн маселелер боюнча түшүндүрмө берип, грузин тараптын ачык диалогго даяр экенин билдирди. Ошондой эле ал эки өлкөнүн тиешелүү мамлекеттик органдарынын жана бизнес коомчулуктарынын катышуусу менен биргелешкен чечимдерди иштеп чыгуунун маанилүүлүгүн баса белгиледи.
