Бишкек, 19.11.25. /Кабар/. Франциялык жаратылыш сүйүүчүлөр Чаткал районундагы Беш-Арал мамлекеттик жаратылыш коругуна жогорку баасын беришти.
Жаратылыш ресурстары, экология жана техникалык көзөмөл министрлигинен билдиришкендей, аталган корук ЮНЕСКОнун Дүйнөлүк жаратылыш мурастарынын тизмесине кирген.
Франция мамлекетинен келген жаратылыш сүйүүчүлөрдүн тобу Wildlife Expeditions Kyrgyzstan экспедициялык иш-чаранын жүрүшүндө коруктун аймагында байырлаган жапайы жаныбарлардын жана өзгөчө корголгон аймактын жаратылышы боюнча баалуу сүрөт материалдар менен бөлүштү.
Батыш Тянь-Шандын жаратылышы өзүнүн биологиялык ар түрдүүлүгү, сейрек кездешүүчү фауна жана флоранын түрлөрү, өзгөчө кооз тоолуу ландшафттары менен келген коноктордун өзгөчө кызыгуусун жаратып, терең таасир калтырды.
Экспедициянын катышуучулары аймактын жапайы жаныбарларынын табигый жүрүм-туруму, экосистемалардын сакталгандыгы жана коруктун уникалдуу биоэкологиялык маанисине жогорку баасын беришти.
