Бишкек, 15.06.26. /Кабар/. Франциялык компания Манас шаарында асма жол курууну сунуштады. Бул тууралуу муниципалитеттен билдиришти.
Шаар мэри Абдупата Маткаликов франциялык компаниянын Борбор Азия жана Батыш Балкан аймагындагы коммерциялык директору Орхан Ширин баштаган делегацияны кабыл алды.
Жолугушууда тараптар Манас шаарында туристтик инфраструктураны өнүктүрүү багытындагы инвестициялык долбоорлорду талкуулашты. Франциялык компания шаар аймагында асма жол куруу демилгесин расмий түрдө сунуштады.
Эгер бул долбоор ишке ашса, ал шаардагы туристтик агымды көбөйтүүгө, эс алуу инфраструктурасын жакшыртууга жана коноктор үчүн ыңгайлуу шарттарды түзүүгө өбөлгө болот. Ошондой эле ички жана тышкы туризмди өнүктүрүүгө жана жергиликтүү экономиканы колдоого түрткү берери белгиленди.
Тараптар мындан аркы кызматташтыкты улантуу жана долбоордун техникалык-экономикалык негиздемесин даярдоо боюнча макулдашышты.
