Бишкек, 24.06.26. /Кабар/. Кечээ, 23-июнда Бишкек шаарындагы Т. Усубалиев атындагы аянтта 2026-жылдагы Дүйнө чемпионатынын финалдык этабынын экинчи турунун алкагында өткөн Португалия – Өзбекстан беттешин көрүү үчүн күйөрмандар аянтчасы уюштурулду.
Муниципалитеттен билдиришкендей, борбор калаанын тургундары жана коноктору үчүн оюнду түз эфирде көрсөткөн чоң экран орнотулду. Иш-чарага футбол сүйүүчүлөрү көп санда чогулуп, командаларды колдоп, дүйнөлүк футбол майрамынын өзгөчө атмосферасын бирге сезүүгө мүмкүнчүлүк алышты.
"Беттештин жүрүшүндө күйөрмандар аянтчасында өзгөчө шаңдуу жана эмоцияларга бай атмосфера өкүм сүрдү. Күйөрмандар эки команданы тең кызуу колдоп, борбор калаанын чок ортосунда чыныгы футбол майрамын жаратышты. Оюндун эң курч жана чечүүчү учурлары көрүүчүлөрдүн кызуу кол чабуусу жана кубаттоосу менен коштолду",-деп айтылат маалыматта.
