Бишкек, 16.02.26. /Кабар/. Жогорку Кеңеш менен Европа парламентинин ортосундагы парламенттер аралык кызматташтык комитетинин 18-отуруму өттү. Бул тууралуу парламенттен билдиришти.
Жыйынга Жогорку Кеңештин төрагасынын орун басары Жылдыз Таалайбек кызы жана депутаттар Салтанат Аманова, Махабат Мавлянова, Алтынбек Кылычбаев, Исманали Жороев катышты.
Европа парламентинин делегациясын Джузи Принчи жетектеп, анын курамында депутаттар Свен Симон, Тьерри Мариани, Кристиан Вигенин болду.
Жыйындын жүрүшүндө Кыргызстан менен Европа биримдигинин ортосундагы кызматташтыктын учурдагы абалы жана келечеги, соода-экономикалык байланыштар, инвестициялык климат, аймактык саясат, билим берүү жана гуманитардык байланыштар маселелери талкууланды.
Иш-чарада сөз сүйлөгөн эл өкүлү Салтанат Аманова парламенттер аралык кызматташтык Кыргызстан менен Европа биримдигинин ортосундагы ишенимди бекемдөөнүн маанилүү механизми болуп саналарын белгилеп: "Биз бул диалогду мындан ары да ырааттуу өнүктүрүүгө кызыкдарбыз", – деди.
Депутат Алтынбек Кылычбаев да Кыргызстан Европа биримдиги менен саясий диалогду жана соода-экономикалык кызматташтыкты жигердүү өнүктүрүп жатканын айтты.
Визалык режимди жеңилдетүү маселеси да өзгөчө көңүл чордонунда болду. Алсак, Джузи Принчи: "Визалык режимди жеңилдетүү маселеси бүгүнкү күндө актуалдуу бойдон калууда. Бул маселе Европа биримдиги тарабынан каралып жатат", - деп билдирди.
Жыйынтыгында тараптар парламенттер аралык диалогду мындан ары да активдештирүүгө жана эки тараптуу кызматташтыкты тереңдетүүгө даяр экендиктерин ырасташты.
