Бишкек, 02.06.26. /Кабар/. Эсептик ченди 12 пайыз деңгээлинде сактоо Кыргызстандагы инфляцияны басаңдатууга шарт түзөт. Бул тууралуу Евразия өнүктүрүү банкынын апталык макроэкономикалык серебинде айтылат.
Банктын аналитиктери Кыргызстандын Улуттук банкынын эсептик ченди 12% деңгээлинде өзгөрүүсүз калтыруу чечимине баа беришти.
ЕАӨБдүн эксперттери белгилегендей, финансылык жөнгө салуучу орган инфляциялык процесстерди басаңдатуу үчүн акча-насыя саясатынын инструменттерин колдонууда. Бул чара макроэкономикалык туруктуулукту камсыздап, улуттук валютанын позициясын бекемдейт.
Финансылык рыноктогу акыркы өзгөрүүлөр:
- Овернайт кредиттери боюнча чен 14% деңгээлинде өзгөрүүсүз сакталды;
- Овернайт депозиттери боюнча чен 6%дан 10%га чейин көтөрүлдү.
"Жогорудагы кадамдар калктын жана бизнестин каражат топтоого тезирек өтүүсүнө түрткү берет. Акча-насыя саясатынын мындай чаралары инфляциянын басаңдашына жана анын максаттуу багыт болгон 5-7%дык чекке кайтып келишине өбөлгө түзөт деп эсептейбиз", - деп айтылат ЕАӨБдүн расмий маалыматында.
