Кыргызстанда курулуш тармагын санариптештирүүнүн жаңы этабы башталды — өлкөдөгү бардык курулуш объектилеринде жайгаштырылуусу милдеттүү болгон бирдиктүү маалыматтык курулуш паспорту киргизиле баштады. Бул тууралуу «Кабар» агенттигине курулуш, архитектура жана турак жай-коммуналдык чарба министри Нурдан Орунтаев билдирди.
Министрдин айтымында, курулуш паспортун киргизүү — жыл башында QR-коддор ишке киргизилгенден кийинки санариптештирүүнүн экинчи этабы болуп саналат.
«Биз QR-коддорду жыл башында эле ишке киргизгенбиз. Бирок мыйзам боюнча ар бир курулуш компаниясы өзүнүн объектисине паспорт жайгаштырууга милдеттүү. Ошондуктан QR-коддордон кийин биз санариптештирүүнүн экинчи этабына — бирдиктүү курулуш паспортун киргизүүгө өттүк. Бул документте курулуш тууралуу бардык маалымат камтылган: курулуш качан башталган, кайсы компания аткаруучу болуп саналат, иштер кайсы этапта, качан бүтүрүү пландалууда, кайсы долбоорлоо уюму тартылган. Ошондой эле паспорттун үстүндө QR-код жайгаштырылган, ал аркылуу министрликтин сайтына өтүп, курулуш мыйзамдуу жүрүп жатканы же жоктугу текшерилет», — деди Нурдан Орунтаев.
Министр белгилегендей, бирдиктүү курулуш паспорту бардык объектилер үчүн милдеттүү болуп саналат — көп кабаттуу турак үйлөрдөн тартып социалдык мекемелерге чейин.
«Бул турак жай сатып алган жарандарга курулуштун мыйзамдуулугуна ишенүүгө мүмкүндүк берет», - деп кошумчалады ал.
Ал эми «Кут курулуш» курулуш компаниясынын юристи Давлет Жумабаев министрликтин бул демилгесин колдоп, курулуш паспорту тармакты ачык жана үлүш менен батир сатып алуучулар үчүн коопсуз кылат деп белгиледи.
"QR-код объект тууралуу толук маалымат берет, анын ичинде анын курулушуна негиздер жана бардык зарыл уруксаттардын бар-жогун дагы. Бул сатып алуучулар үчүн да, өкмөт үчүн да ыңгайлуу. Мурда мыйзамсыз курулуштарды жашырууга мүмкүн болсо, мындан ары бул мүмкүн эмес: паспорттун жоктугу дароо эле мыйзам бузууну көрсөтөт. Мындан тышкары, паспорт мүлктүн курулуш долбоорлорунун реестрине киргизилгендигин жана мыйзамдуу долбоорлордун реестрине кирерин тастыктайт", - деди ал.
Министрдин тапшырмасына ылайык, өлкөнүн бардык курулуш объектилери үчүн бирдиктүү маалыматтык паспорттун форматы милдеттүү болуп калды.
Паспорт төмөнкүлөрдү камтыйт:
- Курулуш министрлигинин расмий логотиби;
- Мүлктүн аталышы жана дареги;
- Курулуш компаниясы жөнүндө маалымат;
- Жооптуу адистердин реквизиттери жана алардын байланыш маалыматтары;
- Уруксат кагаздарынын номерлери;
- Курулуштун башталышы жана аяктоо мөөнөтү;
- Онлайн кошумча маалымат алуу үчүн QR коду.
Бирдиктүү паспортту киргизүү ачык-айкындуулукту жогорулатууга, мамлекеттик көзөмөлдү күчөтүүгө, жарандардын турак жай сатып алуудагы укуктарын коргоого багытталган.
