Бишкек, 22.08.25. /Кабар/. Бүгүн Эмгек, социалдык камсыздоо жана миграция министрлигинин кызматкерлери Республикалык кан борборунда өткөн кан тапшыруу акциясына активдүү катышты.
Ведомстводон маалымдашкандай, акциянын максаты – кан куюуга муктаж болгон бейтаптардын өмүрүн сактап калууга көмөктөшүү.
Министрликтин жетекчилиги жана кызматкерлери бул маанилүү демилгени колдоп, өз салымдарын кошушту.
Кан тапшыруунун алдында бардык катышуучулар медициналык кароодон өтүштү.
Адистер белгилегендей, кан жана анын компоненттерин куюу жыл сайын миллиондогон адамдардын өмүрүн сактап, оор абалдагы бейтаптардын жашоосун узартууга жана сапатын жакшыртууга өбөлгө түзөт.
Белгилей кетсек, буга чейин министрлер кабинетинин төрагасы Адылбек Касымалиев мамлекеттик кызматкерлерди кан тапшырууга жана ыктыярдуу донор болууга чакырып, бул багытта активдүү жарандык позицияны көрсөтүүгө үндөгөн.
Анын айтымында, кан тапшыруу – адамдын өмүрүн сактап калууга жардам берген асыл иш. "Ар бир тамчы кан – бул кимдир бирөө үчүн жашоо. Мамлекеттик кызматкерлер коом алдында үлгү болушу керек", – деди Адылбек Касымалиев.
Ал ошондой эле мамлекеттик мекемелерде кан тапшыруу өнөктүктөрүн уюштурууну жана кызматкерлерге бардык шарттарды түзүүнү тапшырды.
