Бишкек, 22.10.25 /Кабар/. Күн мурун башкы прокурор Максат Асаналиев Тажикстандын Душанбе шаарында өткөн КМШга мүчө мамлекеттердин башкы прокурорлорунун координациялык кеңешинин 35-жыйынына катышты..
Башкы прокуратурадан билдиршкендей, жыйын шериктештикке мүчө өлкөлөрдүн прокуратура органдарынын өз ара кызматташтыгын чыңдоо, кылмыштуулукка каршы күрөшүүнүн механизмдерин өркүндөтүү, көзөмөл ишмердүүлүктү санариптештирүү жана жарандардын укуктарын камсыз кылуу маселелерин талкуулоонун маанилүү аянтчасы болду.
Жыйындын алкагында Асаналиев Россия жана Тажикстандын башкы прокурорлору, ошондой эле кылмыштуу кирешелерди адалдоого жана терроризмди каржылоого каршы аракеттенүү боюнча Евразия тобунун төрагасы менен эки тараптуу жолугушууларды өткөрдү.
Сүйлөшүүлөрдүн жүрүшүндө терроризмге, экстремизмге жана транс улуттук уюшкан кылмыштуулукка каршы күрөшүү, эл аралык укуктук жардам көрсөтүү механизмдерин өркүндөтүү, прокуратура ишмердүүлүгүн санариптештирүү жана кирешелерди адалдоого каршы аракеттенүү жаатында тажрыйба алмашуу сыяктуу кызматташтыктын артыкчылыктуу багыттары талкууланды.
Тараптар прокурордук көзөмөлдүн натыйжалуулугун жогорулатууга, каржылык ачыктыкты камсыз кылууга жана региондук коопсуздукту бекемдөөгө багытталган биргелешкен демилгелерди ишке ашыруу боюнча өз ара кызматташтыкты тереңдетүүгө даяр экендигин тастыкташты.
