Бишкек, 25.07.26 /Кабар/. Бүгүн VI Дүйнөлүк көчмөндөр оюндарынын алкагында уюштурулган "Биримдик кербени" аттуу 40 күндүк улуттук жүрүш Баткен облусунун Раззаков шаарынан расмий түрдө старт алды.
Президенттин Баткен облусундагы өкүлчүлүгүнөн билдиришкендей, Лейлек районунан жолго чыккан 10 өкүлдү (атчан) облус башчысынын орун басары Максатай Каримбердиева, Лейлек районунун акими Жеңишбек Асылбек баштаган жетекчилер, аксакал ата-апалар батасын берип узатты.
Улуттук жүрүшкө чыккан Лейлек районунун өкүлдөрүнө, алдыда Баткен жана Кадамжай райондорунун 20 өкүлү кошулуп, жолду улашат.
"Биримдик кербени" – өлкөнүн бардык 40 районун камтыган, улуттук биримдикти, маданий мурастарды жана аймактар аралык ынтымакты чыңдоого багытталган ири долбоор. Жүрүш 25-июлдан 2-сентябрга чейин уланып, ага 400дөн ашуун катышуучу катышат.
Долбоордун негизги өзгөчөлүгү – ар бир райондон алынган булак суусу кербен аркылуу өлкөнүн бардык аймактарын кыдырып өтүп, соңунда Ысык-Көл облусунда өтө турган VI Дүйнөлүк көчмөндөр оюндарынын алкагындагы "40 уук – бир түндүк" маданий иш-чарасында бир казанга бириктирилет. Бул өлкөнүн биримдигин, ынтымагын жана бүтүндүгүн даңазалаган символдук жөрөлгө болуп саналат.
Кербендин багыты Баткенден башталып, Кыргызстандын бардык аймактарын аралап өтөт. 26-августта кербен Ысык-Көл облусунун Балыкчы шаарына жетип, 27-августта салтанаттуу тосуп алуу аземи өткөрүлөт. Ал эми 28–29-август күндөрү эл аралык маданий иш-чаралардын алкагында 40 райондун суусу өткөрүп берилет.
"Биримдик кербени" – бул жөн гана жүрүш эмес, өлкөнүн бардык аймактарын бир максатка бириктирген, "Суу – жашоонун башаты, биримдик – өлкөнүн күчү" деген идеяны чагылдырган жалпы улуттук демилге.
