Бишкек, 13.03.26. /Кабар/. Камбар-Ата-1 ГЭСин куруу Кыргызстандын энергетика тармагында чоң мааниге ээ жана бүтүндөй Борбор Азиянын энергетикалык келечегине, азык-түлүк коопсуздугуна болгон ишенимин бекемдейт. Бул тууралуу Дүйнөлүк банктын Кыргызстандагы өкүлчүлүгүнүн башчысы Хью Ридделл энергетика министри Таалайбек Ибраев менен жолукканда билдирди.
Министрлик маалымдагандай, жолугушууда Таалайбек Ибраев тармактагы жаңылануулардын натыйжасында өткөн кыш мүчүлүштүксүз өткөнүн айтты. Ал Дүйнөлүк банкка колдоосу үчүн ыраазычылык билдирип, жабдыктарды жаңылоо жана тариф саясаты боюнча маалымат берди.
Хью Ридделл министрликтин ишин "мыкты" деп баалап, Камбар-Ата-1 ГЭСи өлкөнүн энергетикалык келечегине ишеним берерин белгиледи. Ал долбоор боюнча өкмөттөр аралык келишимди түзүү иштери кызуу жүрүп жатканын кошумчалады.
Вашингтондо боло турган жазгы отурумда "Камбар-Ата-1 ГЭС" долбоору тууралуу кошумча талкуулар улантылат. Бул жолугушууда долбоордун техникалык, экономикалык жана экологиялык аспектилерин чыңдоо, ошондой эле Дүйнөлүк банктын колдоосу менен долбоордун ийгиликтүү ишке ашышын камсыздоо маселелери каралмакчы.
Т. Ибраев энергетикада адистерге муктаждык өсүп жатканын айтып, кадрларды даярдоого жана "жашыл" энергетика багытында биргелешип иштөөгө өзгөчө көңүл бурууну сунуштады.
Ошондой эле тараптар биргелешкен долбоорлордун жүрүшүн, анын ичинде ГЭСке техникалык жардам берүү, инфраструктураны модернизациялоо жана "жашыл" энергияны каржылоо маселелерин талкуулашты.
