Бишкек, 02.10.26. /Кабар/. Улуттук тарых музейинде Кыздардын эл аралык күнүнө карата STEAM4Girls программасынын үчүнчү этабынын ачылыш аземи өттү.
Иш-чарага Балдар укуктары боюнча ыйгарым укуктуу өкүлү Асел Чынбаева, агартуу министри Догдуркүл Кендирбаева жана ЮНИСЕФтин Кыргызстандагы Өкүлү Самман Тапа катышты.
Өз сөзүндө Асел Чынбаева кыздардын билим алууда жана кесип тандоодо бирдей мүмкүнчүлүктөрүн камсыздоо мамлекеттик саясаттын артыкчылыктуу багыты экенин баса белгиледи.
“Биз кыздар каалаган кесипти ишенимдүү тандап, илимдин бийиктиктерин багындырып, эң амбициялуу долбоорлорун ишке ашыра алышы үчүн, өз потенциалын эч кандай терс көз караштар менен чектебеши үчүн бардык шарттарды түзүшүбүз керек” — деди Чынбаева.
STEAM4Girls программасы алты жылдан бери өспүрүм кыздардын лидерлик жана санариптик көндүмдөрүн өнүктүрүп келет.
Жаңы этаптын алкагында республика боюнча мектептерде STEAM-клубдарын түзүү пландалууда.
