Бишкек, 08.06.26. /Кабар/. Чүй облусунун Сокулук районунда суюлтулган газды мыйзамсыз сатуу фактылары аныкталды. Бул тууралуу Жаратылыш ресурстары, экология жана техникалык көзөмөл министрлигинен билдиришти.
Маалыматка ылайык, текшерүүдө жалпысынан 3 мыйзамсыз соода түйүнү аныкталган. Алардын экөөнө калктуу конуштардын аймагында жайгаштырылган автоцистерналарды коопсуздук талаптарына ылайык аймактан чыгаруу боюнча милдеттүү сунуштар берилди.
Бир объект боюнча учурда тиешелүү мыйзам чегиндеги чаралар көрүлүүдө.
Экологиялык жана техникалык көзөмөл кызматы жарандардын көңүлүн калктуу конуштардын ичинде көчмө унаада газ толтуруучу станцияларды жана автоцистерналарды жайгаштырууга мыйзам тарабынан тыюу салынганын эскертет.
“Өзгөчө жай мезгилинде абанын температураснын жогору болушу мындай объектилердин кооптуулугун күчөтөт. Коопсуздук талаптарынын сакталбашы бир эле учкундан өрт чыгып, адамдардын өмүрүнө жана ден соолугуна, ошондой эле айлана-чөйрөгө ири зыян келтирүү коркунучун жаратат”, - деп айтылат маалыматта.
