Бишкек, 30.03.26. /Кабар/. Өзгөчө кырдаалдар министри Канатбек Чыныбаев Чүй облусу менен Бишкек шаарында жайгашкан ӨКМдин өрт-куткаруу бөлүктөрүн кыдырып, өздүк курамдын иштөө шарттары менен таанышты. Бул тууралуу аталган министрликтен билдиришти.
Маалыматка ылайык, министр ӨКМдин Бишкек шаары боюнча башкармалыгына караштуу №3, №4, №8 өрт-куткаруу бөлүктөрүнө, Токмок шаарындагы №21, Чүй районундагы №24, Кемин районундагы №5, Ысык-Ата районундагы №4 жана Кант шаарындагы №27 бөлүктөрүнө иш сапары менен барып, материалдык-техникалык базанын абалына өзгөчө көңүл бурду.
Ошондой эле ал өрт өчүрүүчү-куткаруучулардын күжүрмөн даярдыгын, социалдык шарттарын, эс алуу жана нөөмөт өтөө жайларынын талапка шайкештигин текшерип, айрым кемчиликтерди ыкчам жоюу жана кызматтын натыйжалуулугун жогорулатуу боюнча тиешелүү жетекчилерге тапшырмаларды берди.
