Бишкек, 25.06.26. /Кабар/. "SCO Business & Industry Expo Kyrgyzstan 2026" эл аралык көргөзмөсүнө катышуу үчүн келген ШКУга мүчө мамлекеттердин делегация өкүлдөрү үчүн атайын маданий жана туристтик программа уюштурулду.
Инвестициялар боюнча улуттук агенттиктен билдиришкендей, меймандар "Ала-Арча" улуттук жаратылыш паркында болушуп, Кыргызстандын уникалдуу жаратылышы, туристтик потенциалы жана улуттук каада-салттары менен жакындан таанышты.
Улуттук агенттиктин башчысы Равшанбек Сабиров мындай бейформал жолугушуулар өлкөнүн мүмкүнчүлүктөрүн ачууда чоң мааниге ээ экенин белгиледи.
"Кыргызстан инвестициялык өнөктөштүк үчүн ачык. Эл аралык иш-чаралар бизнес өкүлдөрү, инвесторлор жана мамлекеттик институттар ортосунда түз диалог түзүүгө, кызматташуунун жаңы багыттарын аныктоого жол ачат", – деди Сабиров.
"Ала-Арчадагы" маданий программа эл аралык көргөзмөнүн уландысы болуп, катышуучулар ортосундагы өнөктөштүк байланыштарды бекемдөөгө өбөлгө түздү. Анын алкагында ШКУга мүчө мамлекеттердин ортосунда ар түрдүү тармактарда биргелешкен ири долбоорлорду ишке ашыруу мүмкүнчүлүктөрү каралды.
