Бишкек, 27.04.26. /Кабар/. Күн мурун Ю.Фучик атындагы сейил бакта Чернобыль атомдук электр станциясындагы кырсыктын кесепеттерин жоюу күнүнүн 40 жылдыгына арналган эскерүү митинг-реквием өттү.
Муниципалитеттен билдиришкендей, иш-чарага Чернобыль кырсыгынын кесепеттерин жоюуга катышкан адамдар, баатырлардын үй-бүлөлөрү, Бишкек мэри Айбек Жунушалиев, Бишкек шаардык кеңешинин төрагасы Бекжан Үсөналиев, ошондой эле "Союз Чернобыль" коомдук бирикмесинин төрагасы Кадырбек Сасыкулов катышты.
Иш-чара эстеликке гүл коюу менен башталып, "Жалгыз аялдын үнү" музыкалык чыгармасы жаңырды. Андан соң каза болгондорду эскерүү үчүн бир мүнөт унчукпай туруу жарыяланып, үч жолу залп менен ок атылды.
Белгилей кетсек, бүгүнкү күндө Бишкек шаарынын социалдык өнүктүрүү органдарында Чернобыль кырсыгынын кесепеттеринен жабыркаган 263 адам каттоодо турат. Алардын арасында кырсыкка катышуучулардын жесирлери, майыптыгы бар адамдар жана кырсыктын кесепеттерин жоюуга түздөн-түз катышкандар бар.
