Бишкек, 17.02.26. /Кабар/. Бишкектеги өрттөн жабыркаган "Чатыр-Көл" кинотеатрынын ордуна жаңы маданий борбор курулат. Бул тууралуу мэриядан билдиришти.
Учурда маданий борбор куруу долбоорунун алкагында практикалык иштер башталды. Капиталдык курулуш башкармалыгы тарабынан объекттин айланасына тосмолор орнотулуп, имаратты демонтаждоо иштери жүрүүдө.
Белгилей кетсек, 2025-жылдын 5-ноябрында имаратта өрт кырсыгы катталып, анын натыйжасында объект олуттуу жабыркаган. Окуядан кийин Бишкек шаарынын мэри жерине барып, тиешелүү кызматтарга объект боюнча чечим кабыл алуу жана долбоорду ишке ашырууну тездетүү боюнча тапшырма берген.
"Чатыр-Көл" кинотеатры 1967-жылы ачылган. Кийинчерээк "Учур" театрына өткөнү менен, имарат эскирип, оңдоого муктаж болгон.
