Бишкек, 13.11.25. /Кабар/. Кыргызстан, Өзбекстан жана Тажикстандын мамлекеттик чек аралары кесилишкен аймактагы "Достук" стелласынын айланасы көрктөндүрүлдү. Бул тууралуу УКМКнын Чек ара кызматынан билдиришти.
Көрктөндүрүү иштерине Кыргызстандын Баткен, Тажикстандын Исфара жана Өзбекстандын Кокон аймактары боюнча чек арачылары катышты.
Белгилей кетсек, "Достук" стелласы үч мамлекеттин чек араларынын кесилишкен жеринде тургузулуп, үч элдин достук алакасын, чек аралары чектешкен коңшулаш өлкөлөр ортосунда тынчтыкты, биримдикти символдоштурат.
Иш-чаранын жүрүшүндө буга чейин бозоруп турган чек ара аймагын жашылдандыруу, көрктөндүрүү иштери жүзөгө ашырылды. Атап айтканда, кыргыз, өзбек жана тажик чек арачылары 270 даана бак-дарак жана 40 даана арча көчөттөрүн отургузушту. "Достукту" гүлдөтө турчу көчөттөрдү өзбек тарап алып келген.
Биримдиктин, достуктун бекемделиши үчүн күч жумшаган үч мамлекеттин аскер кызматчылары жайыл дасторкон үстүндө биргелешкен түшкү тамактанууну уюштурушту.
