Бишкек, 25.02.26. /Кабар/. Үч-Коргон ГЭСин модернизациялоо долбоорунун алкагында №2 гидроагрегатты демонтаждоо жана жаңы жабдууларды жеткирүү иштери пландуу түрдө улантылууда. Бул тууралуу Энергетика министрлиги билдирди.
Учурда объектиде 44 адис иштеп жатат. Негизги иштер төмөнкү багыттарда жүрүүдө:
- №2 гидроагрегатты демонтаждоо иштерине 19 адис тартылып, чечилген түйүндөр ревизиядан өткөрүлүүдө;
- жаңы агрегат үчүн керектүү жабдуулардын 47,3 пайызы келип түштү. Атап айтканда, генератордун статору, ротору, башкаруу жана муздатуу системалары толугу менен жеткирилди. Ошондой эле жумушчу дөңгөлөк жана башка компоненттер жарым-жартылай келди;
- долбоордук документтерди иштеп чыгуу жана техникалык материалдарды тариздөө иштери активдүү жүрүүдө.
Модернизациянын негизги максаты — ГЭСтин иштөө мөөнөтүн узартуу, электр энергиясын өндүрүүнүн ишенимдүүлүгүн жана натыйжалуулугун жогорулатуу болуп саналат. Долбоорду башкы подрядчы CNEEC жана субподрядчы WanFang компаниялары ишке ашырууда.
