Бишкек, 10.02.26. /Кабар/. Быйыл Ош шаарында 10 жаңы мектеп курулат. Бул тууралуу муниципалитеттен билдиришти.
Бүгүн мэр Жеңишбек Токторбаев жана курулуш, архитектура жана турак жай-коммуналдык чарба министри Нурдан Орунтаевдин катышуусунда жаңы мектептердин курулушу боюнча жыйын өттү.
Жыйындын жүрүшүндө 10 мектептин долбоорлору, алардын курула турган жерлери, инфраструктуралык камсыздоо маселелери жана курулуш иштеринин этаптары талкууланды. Ошондой эле жер тилкелеринин даярдыгы, долбоордук-сметалык документтердин тактыгы жана курулуш мөөнөттөрүн сактоо маселелерине өзгөчө көңүл бурулду.
Жыйындан соң мэр жана министр курула турган 10 мектептин аймагын көрүп чыгышты. Алар объектилердин сапаттуу, заманбап жана ачык-айкын курулушун талап кылышты.
Аталган 10 мектепти 2026-жылдын 1-сентябрына чейин толук бүтүрүп, пайдаланууга берүү пландалууда.
