Бишкек, 03.03.26. /Кабар/. Кыргызстанда тамак-аш өнөр жайын өнүктүрүү жана өндүрүштү модернизациялоо боюнча мамлекеттик программанын алкагында 2026-жылы 75 кайра иштетүү ишканасын ишке берүү долбоору бекитилди. Бул тууралуу Суу ресурстары, айыл чарба жана кайра иштетүү өнөр жайы министрлигинен билдиришти.
Долбоорлорду каржылоонун жалпы көлөмү 6 млрд 203 млн сомду түзүп, каражаттар мамлекеттик жеңилдетилген кредиттер, жеке инвестициялар жана эл аралык уюмдардын эсебинен бөлүнөт.
Аймактар боюнча ишканалардын бөлүштүрүлүшү:
- Нарын облусу — 15 ишкана;
- Жалал-Абад облусу — 14 ишкана;
- Ысык-Көл облусу — 12 ишкана;
- Ош жана Баткен облустары — 9дан ишкана;
- Чүй жана Талас облустары — 8ден ишкана.
Быйыл ишке бериле турган 75 объекттин катарында 14 мөмө-жемишти кайра иштетүүчү, 10 мал союучу жай, 8 этти кайра иштетүүчү (анын ичинен алтоо тоок этин өндүрүүчү) жана 8 сүт ишканасы бар. Ошондой эле 10 соода-логистикалык борбор, 5 жүндү кайра иштетүүчү жана 3 тоют даярдоочу ишкана ачылат. Андан сырткары балык, дары чөп, бал жана минералдык суу өндүрүүчү заводдор ишке кирет.
