Бишкек, 09.02.26. /Кабар/. "Айыл чарбасын каржылоо – 14" долбоорунун алкагында дыйкандарга 6 пайыз менен жеңилдетилген насыялар бериле баштайт.
Суу ресурстары, айыл чарба жана кайра иштетүү өнөр жайы министрлигинен билдиришкендей, долбоордун алкагында кеминде 6 пайыздык чен менен 2 млрд 448 млн сом жеңилдетилген насыя берүү каралган.
Насыялар "Айыл Банк" жана "Элдик Банк" ААКтар аркылуу берилет. Насыя берүү шарттары:
"Мал чарбачылыгы" жана "Өсүмдүк өстүрүү" багыттары боюнча:
- мөөнөтү — 36 айга чейин;
- 500 000 сомго чейин — күрөөсүз негизде;
- 1 000 000 сомго чейин — күрөө менен.
"Сууну үнөмдөөчү сугаруу технологиялары" багыты боюнча:
- мөөнөтү — 36 айга чейин;
- 3 000 000 сомго чейин — күрөө менен.
Долбоордун алкагында каралган каражаттар төмөнкүдөй бөлүштүрүлгөн:
- "Мал чарбачылыгы" — 1 713,6 млн сом (70 пайыз);
- "Өсүмдүк өстүрүү" — 489,6 млн сом (20%пайыз);
- "Сууну үнөмдөөчү сугаруу технологиялары" — 244,8 млн сом (10 пайыз).
Белгилей кетсек, министрлер кабинетинин 23-январдагы тескемеси менен "Айыл чарбасын каржылоо – 14" долбоору бекитилген.
