Бишкек, 11.06.26. /Кабар/. Тышкы иштер министринин орун басары Медер Абакиров Румынияга болгон иш сапарынын алкагында Бухарест шаарында бир катар маанилүү жолугушууларды өткөрдү. Бул тууралуу ведомстводон маалымдашты.
ТИМдер аралык консультациялардын жүрүшүндө тараптар саясий, экономикалык жана инвестициялык байланыштарды чыңдоону талкуулашты.
Абакировдун Румыния Сенатынын тышкы саясат боюнча комитетинин төрагасы Титус Корлэцян менен жолугушууда румын тарап Кыргызстан менен Европа биримдигинин ортосундагы өнөктөштүктү бекемдөөгө көмөктөшөрүн билдирди.
Ал эми Энергетика министрлигинин мамлекеттик катчысы Мариус-Виорел Поша менен жолугушуусунда гидроэнергетика жана энергиянын кайра жаралуучу булактарын биргелешип өнүктүрүү маселеси каралды.
Ошондой эле Экономика министрлигинин мамлекеттик катчысы Дан-Адриан Поп менен соода жүгүртүүнү көбөйтүү жана инвестиция тартуу багытында пикир алмашуу болду.
Мындан сырткары, Бухаресттин Соода-өнөр жай палатасынын президенти Юлиу Стоклоса жана румыниялык ишкерлер менен жолугушуу өттү. Анда кыргыз тарап өлкөнүн транспорт, айыл чарба жана экспорттук потенциалы боюнча маалымат берип, румын бизнес өкүлдөрү Кыргызстан менен биргелешкен долбоорлорду ишке ашырууга чоң кызыгуусун билдиришти.
