Бишкек, 23.10.25. /Кабар/. Борбор калаада №100 лицейдин 85 жылдыгына арналган салтанаттуу иш-чара болуп өттү.
Муниципалитеттен билдиришкендей, салтанаттын алкагында лицейдин аймагында жашыл энергетика боюнча окуу борбору жана кыргыз-түрк маданий борбору ачылды.
Бишкек шаарынын мэри Айбек Жунушалиев иш-чарада сөз сүйлөп, экологиялык таза технологияларды өнүктүрүүнүн жана квалификациялуу кадрларды даярдоонун маанилүүлүгүн баса белгиледи.
"Бүгүнкү күндө Бишкек шаарында заманбап технологияларды ишке ашыруу иштери жигердүү жүрүп жатат. Өзгөчө, быйыл декабрь айында ишке киргизүү пландалган "жашыл" энергетиканын элементтери камтылган катуу тиричилик калдыктарын кайра иштетүүчү завод курулууда. Мындай долбоорлорду ишке ашыруу үчүн өлкөгө жаңы муундагы адистер абдан зарыл. Ошондуктан жашыл энергетика боюнча борбордун ачылышы — маанилүү жана өз учурунда жасалган кадам. Мындай борборлор башка лицейлерде да ачылат деп ишенем", - деди мэр.
Расмий аземден кийин коноктор жаңы борборлор менен таанышып, майрамдык концерттик программага күбө болушту.
Иш-чарага министрлер кабинетинин төрагасынын биринчи орун басары Данияр Амангелдиев, агартуу министри Догдуркүл Кендирбаева, Бишкек шаарынын мэри Айбек Жунушалиев, Түркиянын Кыргызстандагы элчиси Мекин Мустафа Кемал Окем жана башка коноктор катышты.
