Бишкек, 02.10.26. /Кабар/. Бүгүн, 2-октябрда Бишкек шаарында "Эгемендүүлүк доорунда Бишкек шаарынын өнүгүүсү: жетишкендиктер, көйгөйлөр жана келечек" аттуу эл аралык илимий-практикалык конференция болуп өттү.
Мэриядан билдиришкендей, конференцияга мамлекеттик жана коомдук ишмерлер, илимий жана эксперттик коомчулуктун, муниципалдык органдардын өкүлдөрү, архитекторлор, шаар куруу адистери, экологдор, экономисттер, жогорку окуу жайлардын окутуучулары жана жаш окумуштуулар катышты.
Борбор калаанын башчысы Айбек Жунушалиев шаардык инфраструктураны өнүктүрүүгө кошкон салымын белгилеп, илимий жана эксперттик коомчулуктун өкүлдөрү менен конструктивдүү кызматташуунун маанилүүлүгүнө токтолду.
Ал конференциянын катышуучулары тарабынан сунушталган сунуштар жана илимий иштеп чыгуулар борбор калааны мындан ары өнүктүрүүнүн багыттарын аныктоодо маанилүү экенин белгилеп, алар шаарды өнүктүрүүгө карата практикалык ыкмаларды калыптандырууда эске алынарын билдирди.
Конференция Бишкек шаарынын өнүгүү жолун илимий-практикалык жактан талдоо, жетишилген натыйжаларды, актуалдуу көйгөйлөрдү жана заманбап чакырыктарды талкуулоо, ошондой эле борбор калааны мындан ары өнүктүрүү боюнча сунуштарды иштеп чыгуу максатын көздөйт.
Иш-чарада шаардык чөйрөнү өнүктүрүүгө байланышкан кеңири маселелер талкууланды. Анын ичинде шаар куруу жана архитектура, транспорттук жана социалдык инфраструктура, экологиялык абал, жашыл аймактарды сактоо жана кеңейтүү, маданий мейкиндикти өнүктүрүү, борбор калаанын экономикалык жана инвестициялык потенциалы, муниципалдык башкарууну санариптештирүү жана туруктуу шаардык өнүгүү маселелерине өзгөчө көңүл бурулду.
Иш-чаранын алкагында Бишкекти өнүктүрүүнүн актуалдуу багыттарына арналган илимий баяндамалар жана аналитикалык материалдар сунушталды. Окумуштуулар, эксперттер жана адистер заманбап шаардык өнүгүү маселелери боюнча пикир алмашып, учурдагы көйгөйлөрдү белгилешти жана аларды чечүүнүн мүмкүн болгон жолдорун талкуулашты.
Ошондой эле жыйын мамлекеттик жана муниципалдык органдардын, илимий коомчулуктун жана тармактык адистердин өз ара кызматташуусу үчүн аянтча болуп берди.
Конференциянын жыйынтыгында Бишкек шаарын мындан ары өнүктүрүү боюнча сунуштарды камтыган резолюция кабыл алынды.
