Бишкек, 28.02.26. /Кабар/. Бишкек шаарынын мэриясы борбор калаадагы мектепке чейинки билим берүү уюмдарында пландан тышкаркы текшерүүлөрдү жүргүзүүдө. Бул тууралуу муниципалитеттен билдиришт.
Мердин орун басары Виктория Мозгачеванын катышуусунда өткөн рейд учурунда №70 жана №111 бала бакчаларында олуттуу мыйзам бузуулар ачыкталган:
- №70 бала бакча: Ата-энелерден тамак-аш үчүн төлөмдөр мекеменин расмий эсебине эмес, кызматкердин жеке мобилдик капчыгына чогултулуп келген. Натыйжада, аталган кызматкер жумуштан бошотулуп, бала бакчанын директоруна тартиптик жаза берилди.
- №111 бала бакча: Тамак-аш азыктарын уурдоо фактысы катталды. Текшерүүдө жашырылган азык-түлүк кутулары табылып, тамактануу нормалары бузулганы аныкталды. Топтолгон материалдар укук коргоо органдарына өткөрүлүп берилет.
Мэрия ата-энелерди төлөмдөрдү расмий реквизиттер аркылуу гана жүргүзүүгө чакырат. Бала бакчалардагы ачык-айкындуулукту камсыздоо максатында мындай текшерүүлөр туруктуу негизде улантылат.
