Бишкек, 16.04.26 /Кабар/. Бишкектеги №46 мектепке 450 орундуу кошумча корпустун курулушу кызуу уланууда.
Курулуш министрлигинен билдиришкендей, бүгүнкү күндө имараттын А блогуна 52 свай орнотулуп, гидроизоляция иштери аткарылууда.
Долбоор мамлекеттик бюджеттен каржыланып, мектеп заманбап үлгүдө салынат. Башкы план боюнча имараттын аянты 4703 чарчы метрди түзүп, 4 блоктуу 3 кабаттан турат. Мектепте заманбап негизги окуу класстар, лаборатория, китепкана, эмгек кабинеттер, жыйындар залы, ашкана жана бардык шарттары менен спорт залы каралат.
Курулуш-монтаждоо иштеринин ар бир этабы текшерилип, Турак жай-жарандык курулуш департаменти тарабынан көзөмөлдөнүүдө.
Белгилей кетсек, свайлык ыкма менен Кыргызстанда биринчи жолу мектеп курулууда. Бул ыкма жер кыртышында суунун көлөмү өтө жогору болгон учурда колдонулуп, имараттын туруктуулугун жана сапатын камсыздайт.
