Бишкек, 27.06.26. /Кабар/. Бишкек шаарында вакциналарды сактоочу жаңы шаардык кампанын курулушу башталды.
Саламаттык сактоо министрлигинен билдиришкендей, долбоор эмдөө системасын мындан ары чыңдоого жана иммунобиологиялык препараттарды ишенимдүү сактоону камсыз кылууга багытталган.
"Курулуш иштерин 2026-жылдын июль айынын аягына чейин бүтүрүү пландалууда. Долбоордун жалпы баасы 107 миң доллардан ашат. Каржылоо Вакциналар жана иммундаштыруу боюнча глобалдык альянстын (Gavi) каражаттарынын эсебинен, ЮНИСЕФтин техникалык колдоосу менен ишке ашырылууда", - деп айтылат маалыматта.
Жаңы кампа вакциналарды сактоо боюнча эл аралык талаптарга толук жооп берет. Ал заманбап муздаткыч жана тоңдургуч жабдуулар, температура менен нымдуулукту сутка бою автоматтык түрдө көзөмөлдөө системасы, ошондой эле электр энергиясы үзгүлтүккө учураган учурда иштей турган резервдик энергия булактары менен жабдылат. Бул вакциналарды саламаттык сактоо уюмдарына сактоо жана жеткирүү процессинин бардык баскычтарында "муздак чынжырдын" талаптарын сактоого мүмкүндүк берет.
