Бишкек, 24.06.26. /Кабар/. Бишкек шаарынын Ак-Жол айылында балыкты кайра иштетүүнүн толук циклин камтыган "Вилби" ЖЧКсынын заманбап комплекси расмий түрдө ачылды.
Суу ресурстары, айыл чарба жана кайра иштетүү өнөр жайы министрлигинен билдиришкендей, жаңы ишкана балыкты кайра иштетүүдөн баштап, даяр продукцияларды чыгарууга жана аларды заманбап муздаткычтарда сактоого чейинки бардык этаптарды камтыйт.
Ишкана суткасына 18 тоннага чейин балыкты кайра иштетүүгө жөндөмдүү жана күнүнө 10 тоннага чейин даяр продукция өндүрөт. Заманбап кампалары бир убакта 1500 тонна продукцияны сактай алат. Ишканада 100гө жакын жаңы жумуш орду түзүлдү.
Долбоор өлкөдөгү өндүрүштү модернизациялоонун негизги өнөктөшү болгон Россия-Кыргыз өнүктүрүү фондунун каржылык колдоосу менен ишке ашырылды.
