Бишкек, 26.02.26. /Кабар/. Бүгүн Бишкекте өрттүн кесепетинен батирлери жабыркаган жарандарга камсыздандыруу сертификаттарын тапшыруу аземи өттү.
Муниципалитеттен билдиришкендей, сертификаттарды Бишкек шаарынын мэри Айбек Жунушалиев жана Мамлекеттик камсыздандыруу уюмунун Бишкек филиалынын директору Алима Нурланова тапшырды.
Жалпысынан 8 жаран компенсация алып, ар бирине 1 млн сомдон төлөндү. Камсыздандыруу төлөмдөрүнүн жалпы суммасы 8 млн сомду түздү.
Айбек Жунушалиев мүлктү камсыздандыруунун маанилүүлүгүн белгиледи.
"Кырсык айттырбай келет. Тилсиз жоо 68 батирге зыян келтирген, бирок алардын ичинен 8и гана Мамлекеттик камсыздандыруу уюму аркылуу камсыздандырылган экен. Биз мүлктү 100% камсыздандыруу милдетин коюп, шаар тургундарын мүлкүн камсыздандырууга чакырабыз", - деди мэр.
Мындан тышкары, Бишкек шаарынын мэриясы өз убагында тиешелүү чечимдерди кабыл алып, дагы өрттөн жабыркаган 22 батирдин жашоочуларына материалдык жардам көрсөткөн.
Эске салсак, 2025-жылдын 15-ноябрында Бишкек шаарындагы Ч. Айтматов проспекти, 16 дарегинде жайгашкан 3 кабаттуу турак жайда өрт чыгып, жалын каптаган аянт болжол менен 800 чарчы метрди түзгөн.
