Бишкек, 14.11.25. /Кабар/. Бишкекте курулуш компанияларынын бирине 423 миң сом айып салынып, иши токтотулду. Бул тууралуу Курулуш, архитектура жана турак жай-коммуналдык чарба министрлигинен билдиришти.
Курулуш объектилерин текшерүүдө Токмок көчөсү 45, 47 жана Загорская көчөсү 22, 24 дарегинде курулуп жаткан 9 кабаттуу турак үйдө курулуш нормаларынын бузулгандыгы жана долбоордон сырткары иш жүргүзүлгөндүгү аныкталган.
Ошондой эле Мичурин 27 дарегинде курулуп жаткан 9 кабаттуу объектиде дагы долбоордон сырткары курулуш иштери жүргүзүлгөн. Натыйжада эки объектинин курулуш иштерин жүргүзгөн "Стальмонтаж плюс" ЖЧКсына карата башкармалык тарабынан акт түзүлүп, 423 миң сом сом өлчөмүндө айып салынды.
Ошондой эле башкармалык тарабынан жазуу түрүндө эскертүү берилип, компаниянын лицензиясы курулуш объектиси долбоорго ылайык келтирилгенге чейин токтотулду.
