Бишкек, 02.10.25 /Кабар/. Бишкектеги Т.Сатылганов атындагы Кыргыз улуттук филармониясында 5-октябрь - Мугалимдер күнү салтанаттуу белгиленди.
Мэриядан билдиришкендей, иш-чарага калаа мэри Айбек Жунушалиев, агартуу министри Догдуркул Кендирбаева жана башка ардактуу коноктор катышып, мугалимдерди жана педагогикалык эмгектин ардагерлерин кесиптик майрамы менен куттукташты.
Шаар мэри жылдын мыкты мугалими наамдарын жеңип алгандарга сыйлыктарды тапшырды.
1-орунга 100 миң сомдук, 2-орунга 80 миң сомдук, 3-орунга ээ болгон мугалимдерге 60 миң сомдук сертификаттар берилди.
"Президенттин колдоосу менен акыркы үч жылда 9 мектеп, 15 кошумча окуу корпусу, 23 бала бакча курулду. Бул иштер улантылып, жаңыдан курулган мектептер модернизацияланып, инклюзивдик принциптерге ылайыкталат. Билим берүү мекемелери жыл сайын капиталдык оңдоодон өтөт. 2025-жылы бул максаттарга, анын ичинде мамлекеттик менчикке кайтарылган мекемелерге бир миллиард сомдон ашык каражат бөлүнгөн. Педагогикалык кадрларды толуктоо жана иш менен камсыз кылуу үчүн шаардык казынадан “Жаш мугалимдин депозити” программасына каражат бөлүнүүдө. «Акыркы үч жылда бул долбоорго 300дөн ашык мугалим катышып, алардын 58и болжол менен 8 миллион сомго ээ болушту", - деди Жунушалиев.
Ошондой эле мэр "Жаш мугалимдин депозити" программасын каржылоону көбөйтүү жана алардын кесиптик деңгээлин жогорулатуу пландарын белгиледи.
