Бишкек, 03.03.26. /Кабар/. Бүгүн Бишкекте жаңы көп функционалдуу маданий борбордун курулушу башталды. Бул тууралуу Маданият, маалымат жана жаштар саясаты министрлигинен билдиришти.
Аталган борбордун курулушу мэриянын колдоосу менен ишке ашырылууда.
Ачылыш аземине катышкан маданият министри Мирбек Мамбеталиев министрлик менен Бишкек мэриясынын ортосундагы тыгыз жана натыйжалуу кызматташтыкты белгиледи.
"Жаңы борбор театралдык коюуларга, концерттерге, кино көрсөтүүлөргө, жаштар демилгелерине жана билим берүү программаларына кеңири аянтча болуп, чыгармачылыктын, диалогдун жана креативдүү индустриянын өнүгүүсүнө өбөлгө түзгөн маанилүү мейкиндикке айланат", - деди.
Белгилей кетсек, "Чатыр-Көл" кинотеатрынын эски имараты 2009-жылы министрликтин карамагында турган "Учур" мамлекеттик жаштар театрынын имараты катары бекитилген, бирок 2025-жылы авариялык абалда деп табылып, бузууга чечим чыгарылган. Андан соң имарат Бишкек шаарынын мэриясынын балансына өткөрүлүп, каражат бөлүнүп, заманбап курулуштун башталышын камсыз кылды.
